ទិដ្ឋភាពខាងមុខលានជល់ដំរី មុនពេលដង្ហែក្បួន

មុនពេលមានការដង្ហែក្បួនសាកល្បង, នៅមុខលានជល់ដំរី មានទិដ្ឋភាពប្លែកភ្នែកជាច្រើន…។

ក្រុមសិល្បករ និងក្រុមកីឡាករជាច្រើនរូប បានរួមគ្នាបង្កើតអោយមាននូវផ្ទាំងទស្សនីយភាពប្លែកៗជាច្រើន ដូចជាការសំដែងរបាំកន្សែងស្នេហ៍ របស់បងប្អូនខ្មែរឥស្លាម, របាំគោះអង្រែ, របាំឳផ្ទៃស្រុកខ្មែរ, ការសំដែងក្បាច់គុនល្បុក្កតោ… និងការលេងល្បែងប្រជាប្រិយខ្មែរ ដូចជា ល្បែងចាប់កូនខ្លែង, ល្បែងទាញព្រ័ត្រ, និងល្បែងលាក់កន្សែងជាដើម…។

អ្វីដែលជាការប្លែកភ្នែកនោះគឺ នៅស្តង់លក់ស្រាបៀរអង្គរ ពួកគេបានតុបតែងខ្លួនតាមបែបបុរាណក្នុងសម័យអង្គរដែរ ដើម្បីឈរចាំទទួលភ្ញៀវ…។

សំរាប់ខ្ញុំ, ក្តារអុកចត្រង្គ នៅតែទាក់ទាញចិត្តខ្ញុំរហូត…។ តាមការអោយដឹងពីអ្នករៀបចំការប្រកួតជ្រើសរើសជើងឯកឆ្នាំនេះ, ការប្រកួតជំរុះ បានធ្វើរួចរាល់ហើយ នៅភ្នំពេញ ដែលមានគូប្រកួតចំនួន ៣២គូ និងជ្រើសយកតែ ៤គូ មកប្រកួតគ្នានៅសៀមរាបនេះ។ គូប្រកួតទាំង ៤គូនេះ នឹងប្រកួតគ្នារយៈពេលបីថ្ងៃ នៅមុខអង្គរតូច ដើម្បីរកអោយឃើញជើងខ្លាំងប្រចាំអង្គរសង្រ្កាន្តឆ្នាំ២០១៤ ហើយខ្ញុំចង់ឃើញការប្រកួតនេះ ខ្លាំងណាស់…៕