លោក ឈុត វុទ្ធី(កាលនៅរស់) និងលោកឧត្តមសេនីយ៍ ម៉ក់ ជីតូ ប្រធានគណៈកម្មការស៊ើបអង្កេត ករណីបាញ់ប្រហារនៅខេត្តកោះកុង កាលពីថ្ងៃទី២៦ ខែមេសា ឆ្នាំ២០១២
ការចាប់ឃាត់ខ្លួនជនសង្ស័យមួយរូប ដែលជា សាក្សីក្នុងហេតុការណ៍បាញ់សម្លាប់មិត្តខ្ញុំ, លោក ឈុត វុទ្ធី (Chut Wutty) និងមន្ត្រីប៉េអិម អ៊ិន រតនា ដោយកងរាជអាវុធហត្ថខេត្តកោះកុង កាលពីថ្ងៃទី០១ ខែឧសភា ឆ្នាំ២០១២ បានបង្កើតអោយមាននូវការមន្ទិលសង្ស័យខ្លាំងឡើងៗ ទៅលើបណ្តាញឈ្មួញរកស៊ីឈើ នៅក្នុងទឹកដីខេត្តកោះកុង ដែលតាមការសន្និដ្ឋានរបស់ខ្ញុំ គឺសុទ្ធតែមានការចូលរួមសហការណ៍គ្នាយ៉ាងស្អិតល្មួត ដោយកំលាំងសមត្ថកិច្ចរបស់ជាតិ រួមមាន កងរាជអាវុធហត្ថ និងរដ្ឋបាលព្រៃឈើខេត្តកោះកុង…។
ដោយសារតែរដ្ឋាភិបាល បានបង្កើតគណៈកម្មការស៊ើបអង្កេត ករណីឃាតកម្មនេះរួចហើយ ហេតុនេះ ខ្ញុំមិនចង់មានយោបល់អីចោទប្រកាន់ ឬអុជអាលទៅលើ ស្ថាប័នជាតិទាំងពីរខាងលើនេះទេ។ តែករណីនេះ គឺដូចគ្នានឹងករណីក្រុមលោក ហេង ពៅ កាលពេលមានអំណាច ដែលដៃម្ខាងចាប់ ដៃម្ខាងជួញដូរ គ្រឿងញាណយ៉ាង សស្រាក់សស្រាំដែរ… ហើយខ្ញុំក៍មានជំនឿដែរថា ករណីឃាតកម្មបាញ់សំលាប់នៅ ខេត្តកោះកុងនោះ គឺមិនមានការពាក់ព័ន្ធជាមួយប្រមុខរាជរដ្ឋាភិបាល ក៍ដូចជា កងរាជអាវុធហត្ថលើផ្ទៃប្រទេស និងក្រសួងកសិកម្ម (រដ្ឋបាលព្រៃឈើ)ទេ… តែនេះគឺជាការអនុវត្តន៍របស់បុគ្គលស្ថាប័នថ្នាក់ក្រោម នៅក្នុងទឹកដីស្រុកស្រែអំបិល ស្រុកមណ្ឌលសីមា និងស្រុកថ្មបាំង នៃអាណាចក្រខេត្តកោះកុងនេះតែម្តង។
សង្កេតមើលរឿងហេតុកាលពីកំឡុងខែវិច្ឆិកា ឆ្នាំ២០១១ កន្លងទៅ… លោក ឈុត វុទ្ធី ធ្លាប់ត្រូវបានសមត្ថកិច្ចមួយក្រុម ដែលអះអាងថា ជាកងរាជអាវុធហត្ថស្រុក ស្រែអំបិល បានធ្វើការឃាត់ខ្លួន និងព្រមានរួចទៅហើយ ក្នុងឳកាសដែលគាត់ បានជូនដំណើរអ្នកកាសែតភ្នំពេញប៉ុស្តិ ចុះទៅយកព័ត៌មាន និងថតរូបភាពគំនរ ស្តុកឈើនៅក្នុងព្រៃ… ពេលនោះ បើកុំតែមានអន្តាគមន៍ទាន់ពេលវេលា ពីមន្ត្រីកងរាជអាវុធហត្ថលើផ្ទៃប្រទេស ម៉្លេះសមពួកដែលអះអាងថា ជាសមត្ថកិច្ចនោះ នឹងបាញ់សំលាប់បំបិទមាត់ តាំងពីពេលនោះបាត់ទៅហើយ។ ហេតុនេះ ពួកគេ (កំលាំងសមត្ថកិច្ច) បានត្រឹមតែព្រមានថា បើលោក ឈុត វុទ្ធី ហ៊ានទៅជាន់ទឹកដីកោះកុងម្តងទៀត ពួកគេនឹងមិនអនុញ្ញាត្តិអោយគាត់ “ចាកចេញ” ទៅវិញរួចឡើយ..!!..
ដោយសារតែលោក ឈុត វុទ្ធី នាំអ្នកកាសែត ចុះទៅកកូរកកាយឆ្នាំងបាយគេ ម្តងជាពីរដងនេះហើយ ទើបបានជាគាត់ទទួលគ្រោះថ្នាក់ រហូតបាត់បង់ជីវិត បែបនេះ… ខ្ញុំហ៊ានអះអាងថា មិត្តខ្ញុំ, លោក ឈុត វុទ្ធី គឺជាមនុស្សតែម្នាក់គត់ ដែលស្គាល់តំបន់ព្រៃស្រោង នៃប្រទេសកម្ពុជាយើងទាំងមូល ច្បាស់ដូចបាតដៃ។ ដោយឡែក តំបន់ព្រៃស្រោងក្នុងខេត្តពោធិសាត់ និងកោះកុង គឺគ្មានអ្វីជាអាថ៌កំបាំង ដែលនឹងគេចផុតពីក្រសែភ្នែកគាត់ឡើយ។ ដោយសារតែសកម្មភាពរបស់គាត់ បានប្រឆាំងទៅនឹងផលប្រយោជន៍នៃការរកស៊ី មានបានរបស់ពួកឈ្មួញទុច្ចរិត និងក្រុមមន្រ្តីពុករលួយ ដៃម្ខាងចាប់ ដៃម្ខាងជួញនេះហើយ ទើបបានជាគាត់ ក្លាយជាបន្លាក្នុងកែវភ្នែក ឬជាឆ្អឹងទទឹងក របស់ពួកគេ ដែលចាំបាច់ត្រូវតែ “កំទេចចោល” អោយខាងតែបាន។
ងាកមកមើលសាក្សី នៅក្នុងហេតុការណ៍បាញ់សំលាប់ ដែលត្រូវបានឃាត់ខ្លួនដោយ កងរាជអាវុធហត្ថខេត្តកោះកុង កាលពីថ្ងៃទី ០១ ខែឧសភា ឆ្នាំ២០១២ វិញម្តង។ សាក្សីរូបនេះ ក៍ជាជនសង្ស័យផងដែរ មានឈ្មោះ រ៉ាន់ បូរ័ត្ន… គាត់គឺជាប្រធាន សន្តិសុខក្រុមហ៊ុនកាប់ឈើមួយឈ្មោះ ធីមប៊ឺ ហ្គ្រីន (Timber Green) ដែលមានទីតាំងនៅវាលបី(កន្លែងកើតហេតុ) ឃុំប៉ាក់ខ្លង ស្រុកមណ្ឌលសីមា ខេត្តកោះកុង។ ជនសង្ស័យ រ៉ាន់ បូរ័ត្ន នេះ គឺជាកូនប្រុស របស់លោក ហ៊ុន រ៉ាន់ ជាប្រធានខណ្ឌ រដ្ឋបាលព្រៃឈើខេត្តកោះកុង ហើយគាត់ (ហ៊ុន រ៉ាន់) ក៍មានភាគហ៊ុននៅក្នុងក្រុមហ៊ុន កាប់ឈើ Timber Green នេះផងដែរ។ តើវាជារឿងគួរអស់សំណើចទេ ដែលមន្ត្រីការពារព្រៃឈើ តែបែរជារកស៊ី កាប់ព្រៃឈើលក់អញ្ចឹង? ហេតុនេះ សូមអស់លោកអ្នកមេត្តាពិចារណា និងរកចំឡើយតាមការគួរដោយខ្លួនឯងចុះ…។
ចុងបញ្ចប់ ខ្ញុំសង្ឃឹម និងជឿជាក់ថា គណៈកម្មការស៊ើបអង្កេតករណីឃាតកម្មនេះ ដែលមាន លោក ម៉ក់ ជីតូ ជាប្រធាន គឺប្រាកដជារកឃើញការពិតនៅក្នុងហេតុការណ៍ បាញ់ប្រហារនេះ សំដៅរកអោយឃើញឃាតករពិត ព្រមទាំងវែកមុខក្រុមហ៊ុន និងមន្ត្រីពុករលួយលើវិស័យព្រៃឈើ ដើម្បីយកមកផ្តន្ទាទោសតាមច្បាប់ ក្នុងន័យបង្ហាញនូវការតាំងចិត្តរបស់រាជរដ្ឋាភិបាល ក្នុងការបំបាត់នូវអំពើពុករលួយ លើវិស័យព្រៃឈើនេះផងដែរ…។
តែយ៉ាងម៉េចយ៉ាងម៉ា សូមអាណិតមេត្តាកុំនាំឃាតករ «សិប្បនិម្មិត» យកមកឡើង លើឆាក នាំអោយឈឺក្បាល ដូចករណីឃាតកម្មលោក ជា វិជ្ជា អោយសោះ។ សុំតែប៉ុណ្ណឹងទេបាទ..!!..
ស្រុកស្រែ
_________________________
អត្ថបទដែលទាក់ទង៖
ស្រុកស្រែ 
ខ្ញុំសុំបានទេអាណឹង !
ចេះតែសុំៗទៅ តាម៉ាប់អើយ…។ សំរាប់តុលាការខេត្តកោះកុង ប្រសិនបើរកយុត្តិធម៌អោយលោក ឈុត វុទ្ធី ក៍ត្រូវតែរកយុត្តិធម៌អោយអ្នកដែលត្រូវគេទាត់ធាក់ក្នុងអូតែល ម្ងៃណោះដែរ… បានស្មើភាពគ្នា… មិនថាអីចឹង? 😀
ឮថាជះលុយច្រើនណាស់ចង់មកដេកម៉ាស៊ីនត្រជាក់នៅផ្ទះ ឱបប្រពន្ធវិញ តែស៊យអីវាទាស់ត្រង់អាវីដេអូក្លីប ណុង កុំអីចេញរួចតាំងពីចាប់ ១ ថ្ងៃម៉េសហាហាហា 😀
អាណិតខ្លោចចិត្តជាងគេ គឺតុលាការ… បំរុងថានឹងបាន “ច្រាសច្រំ” លុយដុំហើយ តែបែរជាអត់អីលិទ្ធទៅវិញ… 😀
ហាហាហា អាណិតឡើងចង់បែកប្រម៉ាត់ហើយខ្ញុំ!!!
កាលបើមានសន្តានចិត្ត អាណិតក្រុមតុលាការសឹងបែកប្រម៉ាត់អីចឹង គឺជាការប្រពៃណាស់… និយាយតាមត្រង់ចុះ ខ្ញុំមានមិត្តភក្តិជាចៅក្រម ព្រះរាជអាជ្ញា ដែលទៅរៀននៅអតីតសហភាពសូវៀតច្រើនគួរសមដែរ… ដែលក្នុងនោះ មានទាំងមន្ត្រីតុលាការកាត់ទោសខ្មែរក្រហមផងដែរ។ សូម្បីតែប្រធានគណ:មេធាវីបច្ចុប្បន្ន ក៍ជាមិត្តចិត្តមួយ ថ្លើមពីរ កាលរៀននៅស្រុកស្អាងជាមួយគ្នាដែរ… តែខ្ញុំអត់ដែលទៅក្បែរ ឬពឹងពាក់មិត្តភក្តិខ្ញុំទាំងនេះសោះ ព្រោះខ្ញុំយល់ថា ប្រសិនបើមានរឿងក្តីក្តាំងនៅតុលាការ ការមិនស្គាល់ចៅក្រម ឬព្រះរាជអាជ្ញា គឺជាការប្រសើរជាងស្គាល់ពួកគេទាំងនោះ… សំខាន់បំផុត ការមិនស្គាល់គ្នា គឺងាយស្រួលតថ្លៃគ្នាត្រង់ៗ ដោយមិនខ្លាចទើសទាល់ចិត្ត… នេះជាបទពិសោធន៍ ដែលខ្ញុំធ្លាប់បានដឹង បានជួបជាមួយតុលាការយើងនាពេលបច្ចុប្បន្ន ដែលកាលណាអត់លុយ គឺអត់ចាំបាច់និយាយគ្នា..!!.. 😀
រឿងឈ្លោះគ្នាក្ដីក្ដាំនៅតុលាការ ខ្ញុំធ្លាប់ឃើញហើយ បើអត់លុយហេ៎ស សុំគូទំនាស់ចាញ់តែម្រ៉ងទៅ! បើទទឺងចង់ឈ្នះ អ្នកកាត់ស៊ី«ញ៉ាំ»ទាំងសងខាង ចុងបញ្ចប់ លក់ផ្ទះសងគេមិនគ្រប់ផង
បើមើលអោយមែនទែនទៅ ស្អីក៏គេធ្វើជាប្រពន្ធ័ដែរ មែនទេ លោកពូស្រុកស្រែ? សូម្បីតុលាការនឹង កាត់ក្តីអោយអ្នកមានឈ្នះរហូត ម្មង។ តុលាការនេះ ឆ្អិនក្បាលស៊ីក្បាល ឆ្អិនកន្ទុយស៊ីកន្ទុយ បោះគេមែន៕
តែពួកគេពេលខ្លះ ឆ្អិនក្បាល ដល់ស៊ីក្បាលអស់ ក៍ច្រាសទាំងកន្ទុយដែលនៅឆៅទៀត… 😀
ខ្ញុំសុំបង្វែរសាច់រឿងបន្តិច យើងមិនបាច់មើលអោយឆ្ងាយទេអារឿងតុលាការខ្មែរនេះ. សូម្បី ទណ្ឌិត ឈូក បណ្ឌិត ដកកាំភ្លើងបាញ់គេស្រស់ៗ ក៍តុលាការខ្មែរកាត់
សេចក្ដីថា ជាការបាញ់ដោយអចេតនាដែរ. ហើយរឿងរបស់លោក ឈុត វុទ្ធី ខ្ញុំដូចជាគ្មានជំនឿថា លោកទទួលបានយុត្តិធម៌ទេ រឿងថ្មីៗស្រស់ៗបែបនេះ គេតែងនាំគ្នានិយាយតែមួយរយះក្រោយទៀតគេនឹងបំភ្លេចជាស្ថាពរ ជនរងគ្រោះនឹងគ្មានយុត្តិធម៌ដដែល ដូចករណីទណ្ឌិត ឈូក បណ្ធិត ជាដើម.
អរគុណ Democratic… សំរាប់ខ្ញុំ ខ្ញុំនៅតែមានជំនឿថា តុលាការនឹងផ្តល់យុត្តិធម៌ជូនជនរងគ្រោះទាំងអស់ជាមិនខាន… ហេតុនេះ ខ្ញុំសូមសំណូមពរដល់ជនរងគ្រោះទាំងអស់ សូមមេត្តាកុំតក់ក្រហល់ពេក… ត្រូវចេះអត់ធ្មត់រង់ចាំយុត្តិធម៌ដែលតុលាការនឹងផ្តល់ជូនជនរង់គ្រោះគ្រប់ៗគ្នា នៅពេលឆាប់ៗនេះហើយ… យ៉ាងយូរណាស់ នៅពេលសេះដុះស្នែង នឹងទទួលបានយុត្តិធម៌ហើយបាទ… 😀
រឿងនេះមិនមែនជារឿងផ្ទាល់ខ្លួន រវាងអ្នកបាញ់ នឹង ជនរងគ្រោះទេ បើតាមស្តាប់មើលទៅ បើបានសិក្សាអំពីការសម្លាប់ រយៈពេលជាង ៣០ ឆ្នាំកន្លងមកនេះ ក្បួនតែមួយ តែមួយបេះបិទ ! មិនថាអញ្ចឹង ?
សួស្តីលោកបង… ដូចបាត់មុខ បាត់សំលេងលោកបងយូរហើយ… រឿងហេតុបាញ់សំលាប់មិត្តខ្ញុំ លោក ឈុត វុទ្ធី គឺខ្ញុំហ៊ាននិយាយត្រឹមតែជារឿងបុគ្គលប៉ុណ្ណោះ ដោយមិនចង់វិភាគវែងឆ្ងាយទេ… តែលោកបងអាចយល់បានហើយថា អ្នកមានអាវុធបាញ់សំលាប់លោក ឈុត វុទ្ធី និងមន្ត្រីប៉េអឹម អ៊ិន រតនា ច្បាស់ជាមានមេកើយ និងបទបញ្ជាពីថ្នាក់លើរបស់គេច្បាស់ណាស់… ដោយសារតែសកម្មភាពរបស់លោក ឈុត វុទ្ធី បានប្រឆាំងទៅនឹងផលប្រយោជន៍មានបានរបស់ពួកគេ ព្រមទាំងប្រឆាំងទៅនឹងការបំផ្លាញសម្បត្តិធម្មជាតិស្រុកខ្មែរ ទើបធ្វើអោយគាត់មានសត្រូវជុំទិស… តើមេក្លោងសត្រូវជុំទិសរបស់លោក ឈុត វុទ្ធី ជានរណា? សំរាប់ខ្ញុំ នៅរកនឹកអត់ទាន់ឃើញនៅឡើយទេ… បើលោកបងដឹង សូមជួយប្រាប់ស្រុកស្រែផង… 😀
ខ្ញុំអត់ចង់ចេញយោបល់
សុំអង្វរ… ថាម៉ាម៉ាត់ទៅពូ..!!.. 😀
អត់! ថាអត់ អត់ហើយ! ម្បាច់ វរ រ៉េ!
ថាម៉ាត់ហូវ… ចាំអោយឆីឆ្អាតមួយ អង្គុយកំដផឹកកាហ្វេ… អាចលូកលាន់តាមឆាបាយ… 😀
អត់រ៉េ គ្របទុកវិញហូវ ញុមបរិសុទ្ធទាំងចិត្ត ទាំងកាយ 😀
ខ្ញុំជឿថា ខ្ញុំដឹងច្បាស់ណាស់ នូវក្បួនសម្លាប់បែបនេះ តែក៏មិនចង់និយាយដែរទេ តែគ្រាន់ចង់និយាយថា ការបាត់បង់មនុស្សបែបលោក ឈុត វុទ្ធី ជាការបាត់បង់នូវ ធនធានមនុស្សខ្មែរសំខាន់ណាស់ បើតាមយោបល់ខ្ញុំ យើងមិនបាច់ធ្វើដល់ថ្នាក់ហ្នឹងទេ ខ្ញុំមើលមិនឃើញថា លោក ឈុត វុទ្ធី ជាសត្រូវបំផ្លាញឆ្នាំងបាយគេទេ នេះមកពីការយល់ខុស មិនមែនយល់ច្រឡំទេ មិនមែនចៃដន្យ ហើយក៏មិនមែនរឿងផ្ទាល់ខ្លួនដែរ តែវាជារឿងនយោបាយច្បាស់ណាស់ ! គឺជារឿងប្រឌិតទាំងស្រុង ហើយរឿងបង្កើតគណៈកម្មការស៊ើបអង្កេត ក៏មិនអាចរករឿងពិតបានដែរ វាជារឿងប្រឌិតដូចតែគ្នាហ្នឹង !
…ហើយខ្ញុំជឿថា ខ្ញុំអាចធ្វើការជាមួយបាន ដោយយល់នូវអ្វី ដែលរដ្ឋាភិបាលខ្មែរសព្វថ្ងៃចង់បាន តែមិនចាំបាច់ប្រើល្បិចរបៀបនេះទេ នេះជាសតវត្សទី ២១ យើងគួរតែផ្លាស់ប្តូរយុទ្ធវិធីថ្មី ជាជាងយកយុទ្ធវិធីចាស់គម្រឹលមកប្រើរបៀបនេះ ដូចជាអន់ហួសពេក មិនមែនអន់អីទេ អន់អារឿងល្បិចសម្លាប់ខ្មែរគ្នាឯង មិនចេះចប់សោះ មិនចេះរាងចាល ស្លាប់អស់បីលាននាក់ហើយ នៅតែចង់សម្លាប់ខ្មែរតទៅទៀត… ខ្ញុំចាំមើលគណៈកម្មការស៊ើបអង្កេតទេ តើចេញលទ្ធផលយ៉ាងម៉េច? ?????????????????
អំណាចយូរអង្វែងវាយ៉ាងដូច្នេះ ។
តាមលិចលឺល្ហៀងៗគេថា ការសំលាប់លោក ឈុត វុទ្ធី ដោយអចេតនាទៀតហើយ!
…ជាការបាញ់ប្រហារដ៏គួរអោយសោកស្តាយ…
សាធុទៀតហើយខ្ញុំ អចេតនា
…ជាឧបទ្ទវហេតុ “ចៃដន្យ” ដ៏គួរអោយសោកស្តាយ…
រកឃាតកពិតប្រាកដមិនឃើញទេ ឈប់បោះឆ្នោតឱ្យហើយ!
កំពុងតែគិតចឹងដែរ… 😀
តាមពិតទៅ ខ្ញុំចង់បានជាងគេ គឺរដ្ឋាភិបាលខ្មែរគួរតែផ្លាស់ប្តូរ យុទ្ធសាស្ត្រចាស់ៗ គម្រឹលហ្នឹងចោលអស់ទៅ គ្មានបានប្រយោជន៍អ្វីទេ ប្រយោជន៍តែមើលមុខគ្នា មិនចំ ធ្វើរបៀបនេះ មិនមែនមានជំហរបង្រួបបង្រួមជាតិទេ តែសម្លាប់ជាតិទៅ វិញទេ ប្រហែលស្មានថាគេ មិនដឹង ឬ យ៉ាងណា ?
បើអ្នកគេរៀនខាងបញ្ចេកទេសសើបអង្កេតវិញ គេដឹងដូចបកចេកចឹង គ្មានរឿងអីបិទបាំងគេជិតទេ យើងចេះតែធ្វើចឹងចេះតែបានហើយ ចង់ធ្វើយ៉ាងម៉េចក៏បាន តែថាឱ្យត្រូវវាមិនត្រូវទេ !
ចាំៗៗៗៗ
ស្រាប់តែចេញមកថា “ដោយអចេតនា” ។
បើកភ្នែកស្លឺឆ្ងល់ដោយឥតមានសេក្ដីបញ្ចប់ -_-
…ទាំងមន្រ្តីការពារធនធានធម្មជាតិ ទាំងមន្រ្តីប៉េអឹម… ទាំងពីរនាក់នេះគឺ “ស្លាប់ដោយអចេតនា” ដូចគ្នា..!!..
កាន់តែច្បាស់ទៅៗហើយតើ! ខ្ញុំចាំតែមើលថាតើមានរឿងអ្វីកើតឡើង?
បាទ, ច្បាស់ណាស់លីហ្សា… គឺស្លាប់ដោយអចេតនា ទាំងពីរនាក់..!!..