កាលពីចុងសប្តាហ៍កន្លងទៅនេះ ដំណឹងដែលខ្ញុំចាប់អារម្មណ៍ជាងគេ គឺព័ត៌មានស្តីពីលោកចៅហ្វាយក្រុង ប៉ា សុជាតិវង្ស, «ឆេះដុំ» នឹងសំណង់ខ្ពស់ពីរកន្លែង ស្ថិតនៅក្បែរវាំងព្រះកូណា ដែលលោកបានចេញបញ្ជាអោយវ៉ៃកំទេចចោលជាបន្ទាន់ ដើម្បីជាការព្រមានដល់អ្នកសាងសង់ក្រោយៗ កុំអោយព្រហើននឹងច្បាប់…។
សំណង់ទី១ ដែលលោកចៅហ្វាយក្រុងយើង ចេញបទបញ្ជាអោយវ៉ៃកំទេច ឬវ៉ៃកំចាត់កំចាយ ដើម្បីតំរូវទៅតាមច្បាប់ឡើងវិញ គឺជាអាគារកំពុងសាងសង់ នៅរុំសំណាញ់នីឡុងពណ៌ខៀវនៅឡើយ ស្ថិតនៅម្តុំខាងក្រោយអាគារយូណេស្កូ តាមបណ្តោយតីរវិថីព្រះសុធារស ជួរមាត់ទន្លេ ចំខាងកើតវាលព្រះមេរុ។ ឯសំណង់ទី២ ជាអាគារអាផាតមេន មើលទៅដូចជាសាងសង់ហើយរួចរាល់ទៅហើយ ស្ថិតនៅខាងលិចរបងវាំង ចំសាលារចនា…។ តាមសារព័ត៌មានបានអះអាងថា សំណង់ទាំងពីរនេះ សុទ្ធតែមានច្បាប់អនុញ្ញាតត្រឹមត្រូវ ដោយសំណង់ទី១ ជាអាគារវឌ្ឍនៈ [ម្ចាស់អាគារនាគ?] ដែលច្បាប់បានអនុញ្ញាតអោយសាងសង់ត្រឹមកំពស់ ១៤ម៉ែត្រ, តែម្ចាស់សំណង់បានសង់រហូតដល់ទៅកំពស់ ២៧ម៉ែត្រ។ ឯសំណង់អាគារអាផាតមេន ដែលម្ចាស់វាអាចជា «យក្ស» ព្រោះកាសែតអត់ហ៊ានបញ្ចេញឈ្មោះម្ចាស់សោះ, គឺបានសង់លើស ២ជាន់កន្លះ បំពានលើច្បាប់អនុញ្ញាត, វាមានកំពស់ខ្ពស់តែឯង ដែលពេលឈរងើយមើលទៅដំបូលអាគារ សឹងជ្រុះឆ្នួតពីក្បាល… ។
ករណីលោកចៅហ្វាយក្រុងយើង ចេញបទបញ្ជាទៅហើយ… ប្រសិនបើឃើញថា សក្តិសិទ្ធិពិតមែន, ក្នុងនាមខ្ញុំជារាស្រ្តតូចតាច គឺសូមអបអរសាទរ..!!… តែ… ចុះបើម្ចាស់គេមិនព្រមវ៉ៃចោល ហើយពួកគេបានប្រើដំណោះស្រាយ «ឈ្នះ!ឈ្នះ!»… ឬក៏ «សហការរីករាយ» ដូចក្នុងកុនចិនវិញ, តើគិតយ៉ាងម៉េចដែរ?…
ខ្ញុំនៅចាំបានថា មានករណីដូចគ្នានេះ កាលពីក្នុងអណត្តិលោកចៅហ្វាយក្រុង កែប ជុតិម៉ា, មានសំណង់អាគារ «សំប៉ែតតោ» មួយ ដែលមានទីតាំងស្ថិតនៅទល់មុខសណ្ឋាគារ Cambodiana ត្រូវបានសង់ឡើងខ្ពស់ចោងណោងតែឯង បំពានច្បាប់អនុញ្ញាតអញ្ចឹងដែរ ហើយកាលណោះ ក៏មានបទបញ្ជាអោយវ៉ៃកំទេចចោលដូចគ្នា…។ តែមិនដឹងយ៉ាងម៉េច… អាចថា ក្នុងពេលកំពុងមានរឿង ម្ចាស់សំណង់បានប្រើវិធីសំរុះសំរួល ចរចា ចិចី ចុចូ ចុំចំ ចាំច្រាស..!!.. ទើបអាគារសំប៉ែតដែលចាត់ទុកថា ខុសច្បាប់នោះ ក៏បានប្រែក្រឡាទៅជាត្រូវច្បាប់វិញ និងមានឈ្មោះថា Landscape Hotel យ៉ាងគ្រហើរៗ រហូតដល់សព្វថ្ងៃនេះទៅ…។
តាមពិតទៅ រឿងវ៉ៃកំទេចចោល ដើម្បីជាការព្រមានទៅដល់អ្នកបំពានច្បាប់ គឺត្រូវតែធ្វើអោយចេញជាការពិតជាក់ស្តែងមែនហើយ។ តែការសំខាន់ជាងនេះទៀត គឺត្រូវតែវែករកមុខមន្រ្តីខិលខូច ដើម្បីនាំយកមកប្រឈមមុខនឹងច្បាប់ ទើបជាការត្រឹមត្រូវជាង ព្រោះមន្រ្តីខិលខូចទាំងនោះហើយ ដែលបានធ្មេចភ្នែកអោយម្ចាស់សំណង់ ប្រើវ៉ាក់សាំងប្រភេទ «លូតកំពស់អាគារ» ស្រេចតែក្បាលវ៉ាល់នោះ..!!..
នឹកឃើញវិធានការណ៍កណ្តាប់ដៃដែក កំទេចអាគារខុសច្បាប់នេះ ខ្ញុំនៅតែនឹកស្ញើចសរសើរចំពោះអតីតនាយឧត្តមសេនីយ៍ ហុក ឡងឌី, ក្នុងពេលដែលលោកចូលកាន់ដំណែងជាចៅហ្វាយក្រុងភ្នំពេញភ្លាម នាឆ្នាំ១៩៩០ បន្តពីលោក ថោង ខុន, គឺលោកនាយឧត្តមសេនីយ៍ បានវ៉ៃកំទេចយ៉អាគារផ្ទះល្វែងនៅម្តុំវត្តកោះ ដែលបានសង់បំពានមកលើចិញ្ចើមផ្លូវធ្វើដំណើរ ធ្វើអោយអ្នករស់នៅក្រុងភ្នំពេញសម័យនោះ នាំគ្នាបើកភ្នែកធំៗ និងសាទរគ្រប់គ្នា…។ ឥឡូវនេះ យើងត្រូវរង់ចាំមើលស្នាដៃលោកចៅហ្វាយក្រុងជំនាន់ទី១៧ យើងវិញម្តង ថាតើមានយុទ្ធសិល្ប៍កំរិតណា?… ឬក៏បានតែត្រឹម«ឆេះដុំ» អត់អំពើទេ..??..!!..
ស្រុកស្រែ
កុំសូវជឿពួកអ្នកដឹកនាំអស់ហ្នុងពេក… កោសៗរកលុយគេនឹងឯង!
😀 អាចថា នេះជាយុទ្ធសិល្ប៍កៀងត្រីអោយចូលស៊ង ក៏មិនដឹង… តែគួរតែរង់ចាំមើលស្នាដៃគាត់ នៅទឹកទី១ នេះសិនទៅ…។ បើមិនកើតទេ លើកក្រោយ ខ្ញុំនឹងផាអោយគាត់ថែមទៀត…។
បើធ្វើមិនបានទេ ខ្ញុំកាត់ក្រវាត់ចោល (ថាតាមសម្ដេច) 😀
កាត់ កមាន់ កទា ក្រវាត់ចោល, ទុកតែសាច់ស៊ីបានហើយ… 😀
ជឿវាទៅៗ..
ពេលនេះ ខ្ញុំប្រថុយជឿដែរណឹង…
ម្យ៉ាងទៀត ដែលអោយគេធ្វើអាគារធំៗអស់ហ្នឹង មិនដឹងថា ដល់សង់រួចទៅ ម្ចាស់ស្រុកមានសិទ្ធិចូលទៅត្រួតពិនិត្យម្ដងៗបានដែររឺអត់ ថាទាំងពួកម្ចាស់ទាំងពួកអ្នកជួល គេកំពុងធ្វើអីខ្លះ រស់របៀបណា …សំងំធ្វើថ្នាំក្លែងក្លាយ លួចបោះពុម្ពលុយក្លែងក្លាយ ចាប់មនុស្សបង្ខាំងអោយលួចធ្វើការ បនល្បែង និងពេស្យាចារ ទីប្រជុំពួកម៉ាហ្វីយ៉ាទាំងតូចៗ ទាំងធំៗ…? ។ល។
លឺគេថា អាដីដែលធ្វើសម្បទានអោយបរទេសខ្លះ ចូលទៅអត់បានទេ កុំចូល មានដល់អ្នកកាន់កាំភ្លើងយាមអោយទៀត មិនដឹងជាវាជីករូងក្នុងដីទៅណា ម៉ោណា ធ្វើអីខ្លះអស់ហើយទេ ? លួចធ្វើអីខ្លះ ? រឺក៏ដូចតាមតែកុងត្រា ? … ដែលខ្ញុំគិតថា ជាម្ចាស់ស្រុក ត្រូវមានសិទិ្ធចូលពិនិត្យមើលបានតាមចិត្តចង់ ឆ្មក់ទៅពេលណាក៏ត្រូវបាន ។ រឺក៏ចាំអាណត្តិក្រោយៗសិនក៏បាន ! 😀
😀 តាមខ្ញុំដឹង អ្នកមានភារកិច្ច ទើបអាចចេញចូលកន្លែងសំខាន់ៗមួយចំនួនបាន។ ឯអ្នកអត់មានកិច្ចការអីផង ម៉េចគេអោយចេញចូលស្រួលៗ?…
បើក្រុមអាជ្ញាធរអាចចេញចូលត្រួតពិនិត្យបាន នោះទើប
ត្រឹមត្រូវ ពេលមានរបាយការណ៍ពីបទសង្ស័យម្ដងៗ។
តាមដំណឺងពីក្រៅស្រុក ស្ដាប់ទៅសំបូររឿងគួរអោយប្រហោងពោះ
ច្រើនណាស់ … 😀
ធម្មតាទេ, កន្លែងរកស៊ីកាប់ឈើ មិនអាចអោយខាងក្រសួងធម្មការ ចេញចូលបានទេ គឺទាល់តែក្រសួងទទួលខុសត្រូវខាងឈើ ទើបអាចចេញចូលបាន… 😀
ម៉េចបាន សំប៉ែត ហើយមាន តោ ?
ចាំខ្ញុំរត់ទៅសួរសម្តេចសង្ឃ «៧មិគសិរ» សិន..!!.. 😀
ស្រែកពិរោះណាស់ពួកគាត់
តែបើអាសូមមូមចូលមាត់ស្ទះខ្យល់
គាត់ស្រែកលែងកើតហើយ កុំទៅឆ្ងល់ពេក!
សម័យគេចាយអាសូមមូម មិនដូចសម័យ បងពតអី។
😀 😀