ខាងក្រោមនេះ ជាទិដ្ឋភាពនៃការសាងសង់ផ្លូវហាយវ៉េ ពីឃុំព្រែកលួង កាត់ទៅវិហារសួគ៌ ក្នុងភូមិសាស្រ្តនៃស្រុកខ្សាច់កណ្តាល ខេត្តកណ្តាល…។
នេះជាការតភ្ជាប់សរសៃឈាម ពីតំបន់សេដ្ឋកិច្ចពិសេសរបស់ក្រុមហ៊ុន 7NG ដែលភ្ជាប់ពីផ្លូវជាតិលេខ៨ នៅម្តុំខាងលិចវិហារសួគ៌ ឆ្ពោះមកកាន់ភូមិសាស្រ្តស្រុកខ្សាច់កណ្តាល និងស្រុកល្វាឯម ស្ថិតនៅទល់មុខរាជធានីភ្នំពេញយើង។
ប្រសិនបើមានស្ពានមួយទៀត ឆ្លងកាត់ទន្លេមេគង្គក្រោម ស្ថិតនៅមាត់ច្រាំងនៃស្រុកកៀនស្វាយ និងស្រុកល្វាឯម, នោះកំពង់ផែទឹកសាបដែលទើបនឹងសម្ពោធដាក់អោយប្រើប្រាស់ថ្មីៗនេះនៅម្តុំឃុំដីឥដ្ឋ គឺពិតជានឹងផ្តល់នូវភាពងាយស្រួលដល់ការដឹកជញ្ជូន និងចរាចរទំនិញ សំរាប់បំរើអោយតំបន់សេដ្ឋកិច្ចពិសេសមួយនេះ ព្រមទាំងផ្តល់នូវភាពងាយស្រួលដល់អ្នកស្រុកដែលរស់នៅប៉ែកខាងល្វាឯម ពារាំង ព្រៃវែងផងដែរ។
បច្ចុប្បន្ន ផ្លូវហាយវ៉េនេះកំពុងស្ថិតនៅក្នុងដំណាក់កាលសាងសង់ដ៏មមាញឹកបំផុត។ មើលតាមភូមិសាស្រ្តជាក់ស្តែង ផ្លូវដ៏ធំទូលាយនេះបានស្ថាបនាកាត់តាមតំបន់ទំនាបនៃវាលស្រែប្រាំង និងបឹងឈូករបស់អ្នកស្រុកខ្សាច់កណ្តាល។ ហេតុនេះ ការកសាងផ្លូវ គឺមានលក្ខណៈជាទំនប់ និងស្ពានបើកមុខទឹក ដែលត្រូវតែខ្ពស់ផុតពីនីវ៉ូទឹកទន្លេក្នុងរដូវវស្សា…។
ខ្ញុំបានសាកសួរអ្នកស្រុកដែលកំពុងយាមចាំចំការឈូក និងធ្វើស្រែប្រាំងនៅលើដីប៉ែកខាងត្បូងផ្លូវ ដែលរងនូវផលប៉ះពាល់ពីការកសាងផ្លូវនេះបានអោយដឹងថាៈ ក្រុមហ៊ុន 7NG បានប្រមូលទិញដីពីពួកគាត់ ក្នុងចំងាយ ២០០ម ពីអ័ក្សផ្លូវ ដោយផ្តល់តំលៃ ៣,០០០ដុល្លារ ក្នុងមួយហិកតា។ អ្នកខ្លះដែលមានដីបួនហិកតា (៤០០ម ពីផ្លូវ) ក៏ត្រូវតែបង្ខំចិត្តលក់អោយក្រុមហ៊ុនទាំងអស់ដែរ ព្រោះក្រុមហ៊ុន 7NG បានប្រកាសអោយដឹងថា ក្រុមហ៊ុននឹងធ្វើរបងខ្ពស់បិទជិតនៅតាមបណ្តោយផ្លូវនេះ។ ដោយហេតុនេះ អ្នកស្រុកគិតយល់ថា នឹងមិនមានផ្លូវចេញចូលទៅធ្វើស្រែប្រាំង ឬដាំឈូកនៅលើដីដែលនៅសេសសល់ ២ហិកតាទៀតនោះបានទេ។ ដូច្នេះ គឺមានតែលក់ជូនក្រុមហ៊ុនបង្ហើយតែម្តងទៅ… អោយវាចប់រឿង..!!..
ខ្ញុំសួរតទៅទៀត៖ ចុះបើនាំគ្នាលក់ «ឆ្នាំងបាយ» អោយក្រុមហ៊ុន 7NG អស់ទៅ តើនាំគ្នារកស៊ីអីវិញ?… ពួកគាត់ប្រាប់ខ្ញុំវិញថាៈ មានឆ្អី… តាមដំណើរទៅ..!!.. ដល់អញ្ចឹងទៅ ខ្ញុំក៏អស់មានឆ្អីឆ្ងល់ទៀតដែរទៅ..!!..??..
(ប្រកាសក្រោយ ខ្ញុំនឹងបង្ហាញពីទិដ្ឋភាពជ្រុងមួយនៃតំបន់សេដ្ឋកិច្ចពិសេស របស់ក្រុមហ៊ុន 7NG ដែលមានទីតាំងស្ថិតនៅខាងត្បូងផ្លូវជាតិលេខ៨ ភាគខាងលិចវិហារសួគ៌ នៃស្រុកខ្សាច់កណ្តាល ខេត្តកណ្តាល…)
-
- ផ្លូវហាយវ៉េ ដែលបែកចេញពីមុខវត្តព្រែកលួង…
-
- ចេញពីភូមិមកបន្តិច ផ្លូវមានសភាពក្រងិក្រង៉ក់
-
- ចាប់ត្រឹមនេះទៅ ផ្លូវត្រង់ភ្លឹង
-
- ម្តុំនេះគឺវាលស្រែប្រាំង និងបឹងឈូករបស់អ្នកស្រុក
-
- ស្រែប្រាំងរបស់អ្នកស្រុក
-
- បឹងឈូក…
-
- ផ្លូវបានពង្រីកពីបង្គោលភ្លើង ទៅខាងត្បូង…
-
- ផ្លូវមានលក្ខណៈខ្ពស់ដូចទំនប់ខាងមុខនេះ…
-
- ដំបូលខៀវៗនោះ គឺរោងចក្រនៅក្នុងតំបន់សេដ្ឋកិច្ចពិសេស របស់ក្រុមហ៊ុន 7NG
-
- ផ្លូវខាងមុខរួមតូចនោះ គឺជាផ្លូវចាស់…
-
- ខ្ញុំស្មានមើលទៅ នៅឆ្វេងដៃជាដីអ្នកស្រុក ឯនៅស្តាំដៃជាដីរបស់ក្រុមហ៊ុន
-
- មើលទៅក្រោយវិញ…
-
- ចាប់ត្រឹមនេះទៅ គឺចូលដល់អាណាចក្រ 7NG…
ស្រុកស្រែ
ស្រុកស្រែ 
ពេលផ្លូវនេះដាក់ឲ្យដំណើរការ តើអ្នកឆ្លងកាត់នឹងតំរូវឲ្យបង់ប្រាក់ឬទេ? ខ្ញុំធ្លាប់គិតថាដីបឹងម្ដុំនេះជាសម្បត្ដិរដ្ឋ តែគេទិញអស់ហើយហ្នឹង! តាមពិតទៅខ្ញុំគិតថាភ្នំពេញមិនទាន់មានឧទ្យានសាធារណៈសមរម្យសំរាប់អ្នកក្រុងអាចលំហែកាយជាមួយគ្រួសារបានទេ។ អញ្ចឹងនាពេលចុងសប្ដាហ៍ ឬពេលថ្ងៃបុណ្យឈប់សំរាក ពួកគេត្រូវបើកឡានទៅឆ្ងាយពីក្រុង។ លើសនេះទៀតខ្ញុំក៏ធ្លាប់គិតថា តំបន់នេះមានសក្ដានុពលខ្ពស់សំរាប់អាកាសយាន្ដថ្មីរបស់ក្រុងភ្នំពេញ។ បច្ចុប្បន្នវាហាក់ដូចជាឆ្ងាយពីក្រុង តែគ្រាន់តែភ្ជាប់ស្ពានឆ្លងទន្លេមេគង្គមួយវានឹងគៀកបង្កើយ។ ចេះតែស្រមៃលេងៗទេស្រុកស្រែអើយ!
គឺពិតជាអីចឹងមែនហើយ… អាចជាផ្លូវបង់លុយច្រើនជាង…។ ម្យ៉ាងទៀត យើងចេះតែនាំគ្នាស្រម័យលេងៗទៅ មិនសូវអផ្សុក… 😀